🚩मावळा कसा असावा🚩

🚩मावळा कसा असावा🚩 

स्वराज्य स्थापनेसाठी शिवाजी महाराजांनी अथक परिश्रम केले आणि त्यात खारीचा वाटा होता तो म्हणजे त्यांचे सहकारी आणि मावळ्याचा. एक मावळा लाख मावळ्यांसारखा होता. महाराजांसाठी एक एक मावळा स्वतःचे जिव द्यायला सुध्दा मागे पुढे बघत नसत. पावनखिंडीतील बाजीप्रभु देशपांडे यांचा पराक्रम आपल्याला माहित आहेच. फक्त ६०० मावळ्यांनी खिंड रोखून ठेवली होती आणि तेही १५००० गनिमांसमोर. केवढे ते शौर्य आणि निस्सीम स्वामीभक्ती! आणि बाजीप्रभुंच्या मनात तर एकच ध्यास होता, 'जोपर्यंत तोफांचा आवाज येत नाही, तोपर्यंत मी लढणार!' आणि शेवटी विशालगडावरून तोफांचा आवाज झाल्यावरच बाजी थांबले. पण ते कामी आले. काय बोलाव याला? काही शब्दच फुटत नाहीत...!! कधीही मावळ्याच्या मुखातून नाही असा शब्द निघत नसे. त्यांना वाटे कधी मोहिम निघेल आणि कधी मोहीम फतेह करू. शिवाजी महाराजांच्या सारखे असे कोणतेच राजे होऊन नाही गेले ज्यांच्या सैन्यात आपापसात स्पर्धा होत असतील. मोहिम निघाली कि तानाजींसारखे मावळे येत आणि बोलत, 'ही मोहिम म्या करणार मला द्या आत्ता फतेह करतो' तेवढ्यात दुसरे मावळे येत आणि मोहिमेची जबाबदारी मागत आणि त्यांच्यात स्पर्धा होत. 'आधी लगीन कोंढाण्याचं मग माझ्या रायबाचं' तानाजीने तर कोंढाणा घेण्यासाठी स्वतःच्या मुलाचे लग्न बाजूला ठेवलं आणि गड फतेह करायला निघाले पण तेही त्यात कामी आले पण गड घेऊनच!!! त्यावेळी तानाजीचे ते शौर्य ऐकून महाराजांच्या मुखातुन आपसुकच 'गड आला पण सिंह गेला' असे उद्गार निघाले असतील... खरचं स्वराज्य स्थापनेमागे मावळ्यांचा खुप मोठा वाटा होता. आज तस काही पहायला मिळत नाही. आजचे मुल आणि मुली स्वतःला शिवरायांचे मावळे मानतात. शिवजयंती जवळ येताच आम्ही शिवरायांचे मावळे आणि आम्ही शिवकन्या असला तोरा असतो मुलांचा. शिवकन्या शिवजयंतीच्या दिवशी साडी आणि दुसर्या दिवशीच जीन्स आणि टाॅप वर पुढे. आणि मावळ्यांच तर काय सांगायला नको. शिवरायांच्या सोबत फोटो काय त्यांच्या सोबत बॅनरवर काय सगळीकडे सारखचं. त्यावेळी मावळे कोणत्याही प्रकारचे अमली पदार्थांचे सेवन करत नसत आणि आत्ताचे मावळे तंबाखू, गुटखा खाऊनच शिवजयंती साजरी करतात. गडकिल्ल्यांवर मद्यपान आणि नाही नाही ते अश्लील चाळे करतात आणि शिवजयंती आली की सर्वत्र कांगावा करतात, गडकिल्ल्यांवर दारू प्यायची नाही असले संदेश देतात.